ល្ងាចនេះ ខ្ញុំនឹងចំណាយពេលបន្តិច ដើម្បីសរសេររៀបរាប់ខ្លះៗអំពីសៀវភៅដែលខ្ញុំបានអានក្នុងឆ្នាំ២០២៤ គិតត្រឹមដើមខែសីហានេះ។ មួយរ...
ល្ងាចនេះ ខ្ញុំនឹងចំណាយពេលបន្តិច ដើម្បីសរសេររៀបរាប់ខ្លះៗអំពីសៀវភៅដែលខ្ញុំបានអានក្នុងឆ្នាំ២០២៤ គិតត្រឹមដើមខែសីហានេះ។ មួយរយៈចុងក្រោយនេះ ខ្ញុំមិនសូវបានសរសេរកំណត់ហេតុនោះទេ ហើយបើខ្ញុំសរសេរក៏កំណត់ហេតុភាគច្រើនមិនត្រូវបានចុះផ្សាយក្នុង Blog ដែរ។ ដោយសារមានបញ្ហាផ្ទាល់ខ្លួនខ្លះក្នុងឆ្នាំ២០២៣ និងបន្តរហូតមកដល់ឆ្នាំ២០២៤នេះ ខ្ញុំមិនសូវបានចុះផ្សាយអត្ថបទឬកំណត់ហេតុផ្ទាល់ខ្លួនរបស់ខ្ញុំក្នុង Blog នោះទេ។ ខ្ញុំមិនបានសរសេរចុះផ្សាយសូម្បីតែអត្ថបទរៀបរាប់ពីសៀវភៅដែលខ្ញុំបានអាន ដែលខ្ញុំតែងតែចុះផ្សាយពីមុនមកមិនដែលខាននោះ។ ពេលដំបូង ខ្ញុំគិតថា ខ្ញុំចង់ផ្អាកចុះផ្សាយពីការសរសេររៀបរាប់ពីសៀវភៅនីមួយៗដែលខ្ញុំបានអានចប់ ដោយប្ដូរទៅជាការសរសេរបូកសរុបរួមពីសៀវភៅដែលខ្ញុំបានអាននៅរៀងរាល់ពេលចុងឆ្នាំ។ ប៉ុន្តែ ថ្ងៃនេះ ខ្ញុំបែរជាចង់ត្រលប់ទៅរកការអនុវត្តដូចពីពេលមុនវិញ គឺបន្តសរសេរចុះផ្សាយពីសៀវភៅដែលខ្ញុំបានអាននៅរៀងរាល់ពេលដែលខ្ញុំបានអានសៀវភៅនីមួយៗនោះចប់។ ហេតុនេះហើយទើបខ្ញុំត្រូវមកចំណាយពេលវេលាក្នុងល្ងាចនេះមកសរសេររៀបរាប់ពីសៀវភៅដែលខ្ញុំបានអាននាពេលកន្លងមកនេះឡើងវិញ ហើយបន្តពីនេះទៅខ្ញុំនឹងសរសេរអត្ថបទចុះផ្សាយនៅរៀងរាល់ពេលដែលខ្ញុំបានអានចប់សៀវភៅនីមួយៗដូចពីពេលមុនៗវិញ។
ក្នុងឆ្នាំ២០២៣ ខ្ញុំបានអានសៀវភៅសរុបទាំងអស់ចំនួន ២៦ ក្បាល។ សម្រាប់ឆ្នាំ២០២៤នេះ មកដល់ខែសីហាទៅហើយ ខ្ញុំទើបតែអានសៀវភៅបានចំនួន ៦ ក្បាល។ វាជាចំនួនតិចតួចណាស់ បើប្រៀបធៀបនឹងសៀវភៅដែលខ្ញុំបានអានកាលពីឆ្នាំកន្លងទៅ។ ការណ៍នេះបណ្ដាលមកពីបញ្ហាដែលខ្ញុំមិនបានរៀបចំនិងអនុវត្តផែនការការងារឲ្យបានល្អត្រឹមត្រូវ។ វាក៏បណ្ដាលមកពីបញ្ហាផ្នែកផ្លូវអារម្មណ៍ខ្លះៗដែលកើតមានស្របពេលដែលខ្ញុំត្រូវរៀបចំសរសេរកិច្ចការនិក្ខេបបទបញ្ចប់ថ្នាក់បរិញ្ញាបត្រជាន់ខ្ពស់របស់ខ្ញុំ។ ដោយសារបញ្ហាទាំងអស់នេះហើយទើបធ្វើឲ្យមានភាពយឺតយ៉ាវក្នុងការអានសៀវភៅក្នុងឆ្នាំនេះ។ សៀវភៅស្ទើរតែទាំងអស់ដែលខ្ញុំបានយកមកអាន ជួនកាលត្រូវទុកចោលអស់ជាច្រើនសប្ដាហ៍ ទើបខ្ញុំអាចរៀបចំពេលវេលានិងប្រមូលអារម្មណ៍មកបន្តអានឡើងវិញឲ្យចប់បាន។ ខ្ញុំនឹងបន្តរៀបរាប់យ៉ាងខ្លីៗបន្តិចទៀតអំពីសៀវភៅដែលខ្ញុំបានអានក្នុងរយៈពេលប៉ុន្មានខែមកនេះ។
សៀវភៅទី១ ដែលខ្ញុំបានយកមកអានក្នុងឆ្នាំ២០២៤នេះ គឺសៀវភៅ Why Has Nobody Told Me This Before? និពន្ធដោយលោកស្រីបណ្ឌិត Julie Smith។ ខ្ញុំបានស្គាល់លោកស្រី និងឃើញសៀវភៅនេះជាលើកដំបូងតាមរយៈ Channel YouTube របស់លោកស្រី។ សៀវភៅនេះជាសៀវភៅបែបចំណេះដឹងមូលដ្ឋាននិងការដោះស្រាយបញ្ហាសុខភាពផ្លូវចិត្ត។ មួយរយៈមុនក៏ខ្ញុំបានអានសៀវភៅបែបនេះជាបន្តបន្ទាប់មកដែរ តែខ្ញុំច្បាស់ក្នុងចិត្តថា កំលុងពេលដែលខ្ញុំកំពុងអាននោះ ខ្ញុំពុំស្ថិតនៅក្នុងស្ថានភាពនៃការត្រូវការជំនួយដើម្បីដោះស្រាយបញ្ហាផ្លូវអារម្មណ៍ឬផ្លូវចិត្តអ្វីនោះទេ។ តែមកដល់ពាល់កណ្ដាលឆ្នាំ២០២៣ រហូតមក ខ្ញុំហាក់ត្រូវការជំនួយនិងចំណេះដឹងបន្ថែមទៀតអំពីសុខភាពផ្លូវចិត្ត ព្រោះខ្ញុំចាប់អារម្មណ៍ឃើញថា ចាប់ពេលពេលនោះមក បើមិនច្រើនក៏ខ្លះៗដែរដែលអារម្មណ៍របស់ខ្ញុំត្រូវបានរងការប៉ះពាល់ដោយរឿងរ៉ាវប្រចាំថ្ងៃផ្សេងៗដែលខ្ញុំបានជួបជាបន្តបន្ទាប់។ ហេតុនេះហើយ ទើបខ្ញុំសម្រេចចិត្តយកសៀវភៅនេះមកអាន។ ខ្ញុំបានទិញសៀវភៅនេះពីហាងសៀវភៅ Bookaholic Cambodia តាំងពីដើមខែតុលា ឆ្នាំ២០២៣។ ពេលទទួលបានសៀវភៅមកភ្លាម ខ្ញុំចង់អានសៀវភៅនេះក្នុងពេលនោះដែរ តែមិនបានអានសៀវភៅនេះភ្លាមទេ ដោយជាប់រវល់ជាមួយការងារ និងរវល់ជាប់អានសៀវភៅសៀវភៅផ្សេងៗទៀត។ ចុងក្រោយ ខ្ញុំក៏សម្រេចចិត្តឆ្លងឆ្នាំជាមួយសៀវភៅមួយក្បាលនេះ គឺថា ខ្ញុំយកសៀវភៅនេះមកអាននៅក្នុងយប់ឆ្លងឆ្នាំ នៅឯស្រុកកំណើត។ ក្រោយពីនោះមក ខ្ញុំបានចំណាយពេលអានសៀវភៅនេះជាបន្តបន្ទាប់ ដោយចំណាយពេលអស់ប្រហែល ១៦ ម៉ោង ទើបខ្ញុំអានអានសៀវភៅនេះចប់។
សៀវភៅទី២ គឺសៀវភៅ Being Happy និពន្ធដោយលោក Matthews Andrew ដែលជាសៀវភៅដែលក្នុងចូលចិត្តជាងគេក្នុងចំណោមសៀវភៅទាំង ៦ ក្បាលដែលខ្ញុំបានអាននាពេលកន្លងមកក្នុងឆ្នាំ២០២៤នេះ។ សៀវភៅនេះបានធ្វើឲ្យខ្ញុំមានអារម្មណ៍រីករាយ និងរសាយអស់ទុក្ខកង្វល់ជាច្រើន។ ខ្ញុំចាប់ផ្ដើមមានអារម្មណ៍ល្អៗច្រើនឡើងវិញដោយសារសៀវភៅមួយក្បាលនេះ។ ជឿខ្ញុំទៅ សៀវភៅនេះជាសៀវភៅដ៏ល្អ ដែលអ្នកគ្រប់គ្នាគួរអាន។ ដោយសារសៀវភៅនេះជាសៀវភៅដែលល្អខ្លាំងណាស់ អ៊ីចឹងហើយខ្ញុំមិនចាំបាច់រៀបរាប់ច្រើនទេ ទុកឲ្យអ្នកទាំងអស់គ្នាចំណាយពេលអានស្វែងយល់ដោយខ្លួនឯងចុះ។
សៀវភៅទី៣ គឺសៀវភៅ Keep Going និពន្ធដោយលោក Austin Kleon។ ខ្ញុំបានស្គាល់សៀវភៅនេះតាមរយៈវីដេអូ YouTube និងការបង្ហោះរូបក្របសៀវភៅក្នុងបណ្ដាញសង្គម Facebook។ ដោយសារក្រោយពេលដែលអារម្មណ៍របស់ខ្ញុំត្រូវបានរងការប៉ះពាល់ដោយរឿងរ៉ាវប្រចាំថ្ងៃផ្សេងៗមក ខ្ញុំហាក់លែងចង់បន្តធ្វើអ្វីដែលខ្ញុំធ្លាប់ចូលចិត្តធ្វើពីមុនមក ហេតុនោះហើយទើបខ្ញុំសម្រេចចិត្តយកសៀវភៅនេះមកអាន។
សៀវភៅទី៤ គឺសៀវភៅ Eat Move Sleep និពន្ធដោយលោក Tom Rath។ ក្រោយពីជួយបញ្ហាជាបន្តបន្ទាប់មក ខ្ញុំកាន់តែយកចិត្តទុកដាក់លើសុខភាព ទាំងផ្លូវចិត្តនិងផ្លូវកាយ។ កាលពីដំបូង ខ្ញុំគិតថា អ្នកនិពន្ធសៀវភៅនេះជាជនជាតិខ្មែរ តែការពិតលោកមិនមែនជាជនជាតិខ្មែរនោះទេ។ បើបានអានសៀវភៅនេះ យើងនឹងកាន់តែយកចិត្តទុកដាក់លើបញ្ហាសុខភាពរបស់យើងទ្វេឡើង។ ជាពិសេសគឺការគិតគូរយ៉ាងខ្លាំងក្លាលើអាហារដែលយើងបរិភោគ រហូតពេលខ្លះខ្ញុំយល់ថា ការរៀបរាប់ក្នុងសៀវភៅនេះ ជាការគិតគូរខ្លាំងជ្រុលពេកទៀតផង។
សៀវភៅទី ៥ គឺសៀវភៅ The 5 Love Languages និពន្ធដោយលោក Gary Chapman។ សៀវភៅនេះក៏ជាសៀវភៅមួយក្បាលដែលខ្ញុំចូលចិត្តដែរ បន្ទាប់ពីសៀវភៅ Being Happy។ ខ្ញុំធ្លាប់បានស្គាល់សៀវភៅនេះជាយូរមកហើយ តែទើបតែមានឱកាសបានអានសៀវភៅនេះ។ ខ្ញុំចំណាយពេលប្រហែល ១១ ម៉ោង ទើបអានសៀវភៅនេះចប់។
សៀវភៅទី ៦ គឺសៀវភៅ How to Break Up With Your Phone និពន្ធដោយលោកស្រី Catherine Price។ ដោយសារមួយរយៈចុងក្រោយនេះខ្ញុំបានចំណាយពេលច្រើនជាមួយទូរសព្ទ ហេតុនេះហើយទើបខ្ញុំសម្រេចចិត្តយកសៀវភៅនេះមកអាន។ ដំបូង ខ្ញុំស្មានតែអ្នកនិពន្ធសៀវភៅនេះជាបុរស តែដល់អានចប់ទើបដឹងថា អ្នកនិពន្ធជាស្រីទៅវិញទេ។ ខ្ញុំទុកសៀវភៅនេះចោលអស់ពេលជាច្រើនខែ ហើយទើបតែបានអានបញ្ចប់នៅដើមខែសីហានេះ។ ក្រោយពីអានសៀវភៅនេះចប់ ខ្ញុំគិតថា ខ្ញុំនឹងផ្អាកអានសៀវភៅបន្តិចសិន ដោយត្រូវទុកពេលវេលាដោះស្រាយការងារនិងបញ្ហាដែលនៅសេសសល់។ តែវាក៏ដូចកាលពីពេលមុនៗដែរ គឺថា ខ្ញុំមិនអាចផ្អាកអានសៀវភៅបាននោះទេ។ ព្រឹកមិញខ្ញុំបានបន្តអានសៀវភៅជាបន្តទៀត ហើយសៀវភៅដែលខ្ញុំកំពុងអាននោះគឺសៀវភៅ "វិធីនិយាយជាមួយកូនវ័យជំទង់" ស្នាដៃដើមរបស់បណ្ឌិត Haim Ginott ហើយត្រូវបានបកប្រែមកជាភាសាខ្មែរដោយលោក ប្រាជ្ញ សម្បត្តិ។
ខ្ញុំសរសេររៀបរាប់ប៉ុណ្ណឹងសិនចុះ។ ជួបគ្នាពេលក្រោយទៀត!
១៣ សីហា ២០២៤ ម៉ោង ៨:៣១នាទីយប់
ក្នុងឆ្នាំ២០២៣ ខ្ញុំបានអានសៀវភៅសរុបទាំងអស់ចំនួន ២៦ ក្បាល។ សម្រាប់ឆ្នាំ២០២៤នេះ មកដល់ខែសីហាទៅហើយ ខ្ញុំទើបតែអានសៀវភៅបានចំនួន ៦ ក្បាល។ វាជាចំនួនតិចតួចណាស់ បើប្រៀបធៀបនឹងសៀវភៅដែលខ្ញុំបានអានកាលពីឆ្នាំកន្លងទៅ។ ការណ៍នេះបណ្ដាលមកពីបញ្ហាដែលខ្ញុំមិនបានរៀបចំនិងអនុវត្តផែនការការងារឲ្យបានល្អត្រឹមត្រូវ។ វាក៏បណ្ដាលមកពីបញ្ហាផ្នែកផ្លូវអារម្មណ៍ខ្លះៗដែលកើតមានស្របពេលដែលខ្ញុំត្រូវរៀបចំសរសេរកិច្ចការនិក្ខេបបទបញ្ចប់ថ្នាក់បរិញ្ញាបត្រជាន់ខ្ពស់របស់ខ្ញុំ។ ដោយសារបញ្ហាទាំងអស់នេះហើយទើបធ្វើឲ្យមានភាពយឺតយ៉ាវក្នុងការអានសៀវភៅក្នុងឆ្នាំនេះ។ សៀវភៅស្ទើរតែទាំងអស់ដែលខ្ញុំបានយកមកអាន ជួនកាលត្រូវទុកចោលអស់ជាច្រើនសប្ដាហ៍ ទើបខ្ញុំអាចរៀបចំពេលវេលានិងប្រមូលអារម្មណ៍មកបន្តអានឡើងវិញឲ្យចប់បាន។ ខ្ញុំនឹងបន្តរៀបរាប់យ៉ាងខ្លីៗបន្តិចទៀតអំពីសៀវភៅដែលខ្ញុំបានអានក្នុងរយៈពេលប៉ុន្មានខែមកនេះ។
សៀវភៅទី១ ដែលខ្ញុំបានយកមកអានក្នុងឆ្នាំ២០២៤នេះ គឺសៀវភៅ Why Has Nobody Told Me This Before? និពន្ធដោយលោកស្រីបណ្ឌិត Julie Smith។ ខ្ញុំបានស្គាល់លោកស្រី និងឃើញសៀវភៅនេះជាលើកដំបូងតាមរយៈ Channel YouTube របស់លោកស្រី។ សៀវភៅនេះជាសៀវភៅបែបចំណេះដឹងមូលដ្ឋាននិងការដោះស្រាយបញ្ហាសុខភាពផ្លូវចិត្ត។ មួយរយៈមុនក៏ខ្ញុំបានអានសៀវភៅបែបនេះជាបន្តបន្ទាប់មកដែរ តែខ្ញុំច្បាស់ក្នុងចិត្តថា កំលុងពេលដែលខ្ញុំកំពុងអាននោះ ខ្ញុំពុំស្ថិតនៅក្នុងស្ថានភាពនៃការត្រូវការជំនួយដើម្បីដោះស្រាយបញ្ហាផ្លូវអារម្មណ៍ឬផ្លូវចិត្តអ្វីនោះទេ។ តែមកដល់ពាល់កណ្ដាលឆ្នាំ២០២៣ រហូតមក ខ្ញុំហាក់ត្រូវការជំនួយនិងចំណេះដឹងបន្ថែមទៀតអំពីសុខភាពផ្លូវចិត្ត ព្រោះខ្ញុំចាប់អារម្មណ៍ឃើញថា ចាប់ពេលពេលនោះមក បើមិនច្រើនក៏ខ្លះៗដែរដែលអារម្មណ៍របស់ខ្ញុំត្រូវបានរងការប៉ះពាល់ដោយរឿងរ៉ាវប្រចាំថ្ងៃផ្សេងៗដែលខ្ញុំបានជួបជាបន្តបន្ទាប់។ ហេតុនេះហើយ ទើបខ្ញុំសម្រេចចិត្តយកសៀវភៅនេះមកអាន។ ខ្ញុំបានទិញសៀវភៅនេះពីហាងសៀវភៅ Bookaholic Cambodia តាំងពីដើមខែតុលា ឆ្នាំ២០២៣។ ពេលទទួលបានសៀវភៅមកភ្លាម ខ្ញុំចង់អានសៀវភៅនេះក្នុងពេលនោះដែរ តែមិនបានអានសៀវភៅនេះភ្លាមទេ ដោយជាប់រវល់ជាមួយការងារ និងរវល់ជាប់អានសៀវភៅសៀវភៅផ្សេងៗទៀត។ ចុងក្រោយ ខ្ញុំក៏សម្រេចចិត្តឆ្លងឆ្នាំជាមួយសៀវភៅមួយក្បាលនេះ គឺថា ខ្ញុំយកសៀវភៅនេះមកអាននៅក្នុងយប់ឆ្លងឆ្នាំ នៅឯស្រុកកំណើត។ ក្រោយពីនោះមក ខ្ញុំបានចំណាយពេលអានសៀវភៅនេះជាបន្តបន្ទាប់ ដោយចំណាយពេលអស់ប្រហែល ១៦ ម៉ោង ទើបខ្ញុំអានអានសៀវភៅនេះចប់។
សៀវភៅទី២ គឺសៀវភៅ Being Happy និពន្ធដោយលោក Matthews Andrew ដែលជាសៀវភៅដែលក្នុងចូលចិត្តជាងគេក្នុងចំណោមសៀវភៅទាំង ៦ ក្បាលដែលខ្ញុំបានអាននាពេលកន្លងមកក្នុងឆ្នាំ២០២៤នេះ។ សៀវភៅនេះបានធ្វើឲ្យខ្ញុំមានអារម្មណ៍រីករាយ និងរសាយអស់ទុក្ខកង្វល់ជាច្រើន។ ខ្ញុំចាប់ផ្ដើមមានអារម្មណ៍ល្អៗច្រើនឡើងវិញដោយសារសៀវភៅមួយក្បាលនេះ។ ជឿខ្ញុំទៅ សៀវភៅនេះជាសៀវភៅដ៏ល្អ ដែលអ្នកគ្រប់គ្នាគួរអាន។ ដោយសារសៀវភៅនេះជាសៀវភៅដែលល្អខ្លាំងណាស់ អ៊ីចឹងហើយខ្ញុំមិនចាំបាច់រៀបរាប់ច្រើនទេ ទុកឲ្យអ្នកទាំងអស់គ្នាចំណាយពេលអានស្វែងយល់ដោយខ្លួនឯងចុះ។
សៀវភៅទី៣ គឺសៀវភៅ Keep Going និពន្ធដោយលោក Austin Kleon។ ខ្ញុំបានស្គាល់សៀវភៅនេះតាមរយៈវីដេអូ YouTube និងការបង្ហោះរូបក្របសៀវភៅក្នុងបណ្ដាញសង្គម Facebook។ ដោយសារក្រោយពេលដែលអារម្មណ៍របស់ខ្ញុំត្រូវបានរងការប៉ះពាល់ដោយរឿងរ៉ាវប្រចាំថ្ងៃផ្សេងៗមក ខ្ញុំហាក់លែងចង់បន្តធ្វើអ្វីដែលខ្ញុំធ្លាប់ចូលចិត្តធ្វើពីមុនមក ហេតុនោះហើយទើបខ្ញុំសម្រេចចិត្តយកសៀវភៅនេះមកអាន។
សៀវភៅទី៤ គឺសៀវភៅ Eat Move Sleep និពន្ធដោយលោក Tom Rath។ ក្រោយពីជួយបញ្ហាជាបន្តបន្ទាប់មក ខ្ញុំកាន់តែយកចិត្តទុកដាក់លើសុខភាព ទាំងផ្លូវចិត្តនិងផ្លូវកាយ។ កាលពីដំបូង ខ្ញុំគិតថា អ្នកនិពន្ធសៀវភៅនេះជាជនជាតិខ្មែរ តែការពិតលោកមិនមែនជាជនជាតិខ្មែរនោះទេ។ បើបានអានសៀវភៅនេះ យើងនឹងកាន់តែយកចិត្តទុកដាក់លើបញ្ហាសុខភាពរបស់យើងទ្វេឡើង។ ជាពិសេសគឺការគិតគូរយ៉ាងខ្លាំងក្លាលើអាហារដែលយើងបរិភោគ រហូតពេលខ្លះខ្ញុំយល់ថា ការរៀបរាប់ក្នុងសៀវភៅនេះ ជាការគិតគូរខ្លាំងជ្រុលពេកទៀតផង។
សៀវភៅទី ៥ គឺសៀវភៅ The 5 Love Languages និពន្ធដោយលោក Gary Chapman។ សៀវភៅនេះក៏ជាសៀវភៅមួយក្បាលដែលខ្ញុំចូលចិត្តដែរ បន្ទាប់ពីសៀវភៅ Being Happy។ ខ្ញុំធ្លាប់បានស្គាល់សៀវភៅនេះជាយូរមកហើយ តែទើបតែមានឱកាសបានអានសៀវភៅនេះ។ ខ្ញុំចំណាយពេលប្រហែល ១១ ម៉ោង ទើបអានសៀវភៅនេះចប់។
សៀវភៅទី ៦ គឺសៀវភៅ How to Break Up With Your Phone និពន្ធដោយលោកស្រី Catherine Price។ ដោយសារមួយរយៈចុងក្រោយនេះខ្ញុំបានចំណាយពេលច្រើនជាមួយទូរសព្ទ ហេតុនេះហើយទើបខ្ញុំសម្រេចចិត្តយកសៀវភៅនេះមកអាន។ ដំបូង ខ្ញុំស្មានតែអ្នកនិពន្ធសៀវភៅនេះជាបុរស តែដល់អានចប់ទើបដឹងថា អ្នកនិពន្ធជាស្រីទៅវិញទេ។ ខ្ញុំទុកសៀវភៅនេះចោលអស់ពេលជាច្រើនខែ ហើយទើបតែបានអានបញ្ចប់នៅដើមខែសីហានេះ។ ក្រោយពីអានសៀវភៅនេះចប់ ខ្ញុំគិតថា ខ្ញុំនឹងផ្អាកអានសៀវភៅបន្តិចសិន ដោយត្រូវទុកពេលវេលាដោះស្រាយការងារនិងបញ្ហាដែលនៅសេសសល់។ តែវាក៏ដូចកាលពីពេលមុនៗដែរ គឺថា ខ្ញុំមិនអាចផ្អាកអានសៀវភៅបាននោះទេ។ ព្រឹកមិញខ្ញុំបានបន្តអានសៀវភៅជាបន្តទៀត ហើយសៀវភៅដែលខ្ញុំកំពុងអាននោះគឺសៀវភៅ "វិធីនិយាយជាមួយកូនវ័យជំទង់" ស្នាដៃដើមរបស់បណ្ឌិត Haim Ginott ហើយត្រូវបានបកប្រែមកជាភាសាខ្មែរដោយលោក ប្រាជ្ញ សម្បត្តិ។
ខ្ញុំសរសេររៀបរាប់ប៉ុណ្ណឹងសិនចុះ។ ជួបគ្នាពេលក្រោយទៀត!
១៣ សីហា ២០២៤ ម៉ោង ៨:៣១នាទីយប់
COMMENTS