ខ្លីៗមុននិងក្រោយការតាំងពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
ខ្លីៗអំពីពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
ពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦ ត្រូវបានរៀបចំឡើងដោយ ក្រសួងវប្បធម៌និងវិចិត្រសិល្បៈ ក្រសួងអប់រំ យុវជន និងកីឡា ក្រសួងព័ត៌មាន បណ្ណាល័យជាតិកម្ពុជា សមាគមបណ្ណារក្សនិងឯកសារវិទូកម្ពុជា សហការជាមួយបណ្ណាល័យតាមគ្រឹះស្ថានអប់រំនានា គ្រឹះស្ថានបោះពុម្ពផ្សាយសៀវភៅ អង្គការជាតិនិងអន្តរជាតិ ព្រមទាំងស្ថាប័នដៃគូពាក់ព័ន្ធជាច្រើនទៀត (រួមមាន Sipar, Room to Read, Shanthi Volunteer Association, IBBY, French Institute of Cambodia, UNESCO, Pannasastra University of Cambodia, BELTEI International University និង Scholar Library) ដើម្បីចូលរួមលើកស្ទួយវិស័យបោះពុម្ពសៀវភៅនៅកម្ពុជា ព្រមទាំងជំរុញឲ្យមានវប្បធម៌នៃការអាននិងតែងនិពន្ធ។គោលដៅនៃពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
តាមការឲ្យដឹងពី លោកស្រី ខ្លូត វិបុលឡា នាយិកាបណ្ណាល័យជាតិកម្ពុជា និងជាគណៈកម្មការរៀបចំពិព័រណ៍សៀវភៅ, ពិព័រណ៍សៀវភៅមានបំណងចូលរួមលើកស្ទួយវិស័យបោះពុម្ពនៅកម្ពុជា ក៏ដូចជាលើកស្ទួយឲ្យមានទម្លាប់អានតាំងពីវ័យកុមារ។ លោកស្រីបញ្ជាក់ថា ពិព័រណ៍នេះចង់បង្ហាញឲ្យសាធារណជនដឹងថា បច្ចុប្បន្នការបោះពុម្ពសៀវភៅមានការរីកចម្រើន មានសៀវភៅច្រើន មានអ្នកនិពន្ធ និងវិចិត្រករច្រើន។ លើសពីនេះទៀត ពិព័រណ៍សៀវភៅមានបំណងលើកទឹកចិត្តឲ្យមានការតែងនិពន្ធ និងបោះពុម្ពផ្សាយសៀវភៅថ្មីៗច្រើនថែមទៀត។កម្មវិធីនានាក្នុងពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
កម្មវិធីក្នុងរយៈពេលបីថ្ងៃនៃពិព័រណ៍រួមមាន៖- ការតាំងពិព័រណ៍ដែលមានការចូលរួមពីអ្នកនិពន្ធចងក្រង អ្នកបោះពុម្ព និងគ្រឹះស្ថានបោះពុម្ពផ្សាយនានាជាច្រើន (មានការលក់បញ្ជុះតម្លៃ)
- កម្មវិធីពិព័រណ៍ខ្នាតតូច (ពិព័រណ៍សរសេរខ្នាតតូច ពិព័រណ៍ផ្នែកវិទ្យាសាស្ត្រខ្នាតតូចSTEM ពិព័រណ៍បោះពុម្ពផ្សាយអេឡិចត្រូនិកខ្នាតតូច និងពិព័រណ៍សៀវភៅខ្នាតតូច)
- កម្មវិធីវាគ្មិន ដែលមានការអញ្ជើញចូលរួមពីវាគ្មិនជាច្រើនរូប លើកយកប្រធានបទផ្សេងៗជាច្រើនទាក់ទងនិងការអាន ការតែងនិពន្ធសៀវភៅផ្នែកវិទ្យាសាស្ត្រទំនើប (STEM) ជាដើម
- កម្មវិធីសួននៃការអានដែលជាបណ្ដុំនៃអ្នកចូលចិត្តអាន ជជែកពិភាក្សាពីអ្វីដែលពួកគេអាន
- កម្មវិធីកម្សាន្តនិងការប្រគំតន្ត្រី ចម្រៀង កំណាព្យ ការចាប់ឆ្នោត និងសំណួរ-ចម្លើយ ជាដើម
- កម្មវិធីសម្រាប់កុមារ រួមមាន ការលេងល្បែងល្បងប្រាជ្ញា ផាត់ពណ៌រូបភាព ការដើរបង្ហាញម៉ូត ជាដើម
- និងកម្មវិធីពិសេសៗជាច្រើនទៀត។
ការតាំងពិព័រណ៍ក្នុងពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
ស្តង់ដែលចូលរួមតាំងពិព័រណ៍រួមមាន៖- ប៉ៃ ណែត
- ធនធានសិក្សាខេប (TTS)
- បណ្ណាគារអង្គរធំ
- គ្រឹះស្ថានបោះពុម្ពផ្សាយ ដាំដើមជីវិត
- បណ្ណាគារអង្គរ
- បណ្ណាគារបន្ទាយស្រី
- COMIC ART
- MIND BOOK
- នគរអាន + កម្ពុមេរ៉ា
- Center for Khmer Studies
- LIBRARY TECH
- Discover Your Greatness
- American Corner / EducationUSA Center
- BOOTH FOR AUTHOR
- Reading Book
- គ្រឹះស្ថានបោះពុម្ព និងចែកផ្សាយ
- សុខ សូផាត / លី តារា
- អង្គការគ្រឹះស្ថានផលិតសៀវភៅប្រាជ្ញា
- បណ្ណាគារ និងគ្រឹះស្ថានផ្សាយសេដ្ឋគុណ
- YOU CAN WIN
- រាហុ៍បោះពុម្ពផ្សាយ
- សាកលវិទ្យាល័យអាមេរិកកាំងភ្នំពេញ (AUPP)
- Reading Book
- UCMAS Cambodia
- Institut français du Cambodge
- EMBASSY OF SWEEDEN
- អង្គការ ស៊ី អេន អឹម
- មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC)
- យសោធរ (YOSOTHOR FOR KHMER CULTURE)
- WISDOM BOOKS PUBLISHING HOUSE
- សង្កប្បអនុវត្តន៍
- ទីភ្នាក់ងារជាតិមុខរបរ និងការងារ (NEA)
- Bong Domrey
- Health Time Corporation
- បណ្ណាគារណុលឡិច
- OPEN BOOK
- ហនុមាន / HANUMAN
- KIDS CITY
- Room To Read
- SANTHI VOLUNTEER ASSOCIATION
- SIPAR
- #ស្រលាញ់សៀភៅ
- 24 Hours English Pronunciation
- FATHER BOOKS and PSE
- CDRI
- Washington DC School
- EDULINK International Campus, Cambodia
- ផ្សេងទៀត។
ខ្លីៗមុននិងក្រោយការតាំងពិព័រណ៍សៀវភៅថ្នាក់ជាតិនៅកម្ពុជាលើកទី៥ ឆ្នាំ២០១៦
តាមការគ្រោងទុក អ្នករៀបចំគ្រោងនឹងចំណាយថវិកាចំនួនប្រមាណ ១ម៉ឺន៧ពាន់ដុល្លារអាមេរិក លើសឆ្នាំមុន ដែលអ្នករៀបចំបានចំណាយថវិការៀបចំចំនួន ១ម៉ឺន២ពាន់ដុល្លារអាមេរិក។ ចំពោះពិធីសម្ពោធពិព័រណ៍សៀវភៅឆ្នាំនេះ តាមការគ្រោងទុកថានឹងមានគណៈអធិបតីចូលរួម អញ្ជើញមកពីបីក្រសួងគឺ ឯកឧត្ដម ខៀវ កាញារីទ្ធ រដ្ឋមន្ត្រី ក្រសួងព័ត៌មាន, ឯកឧត្ដម ហង ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា, និងលោកជំទាវ ភឿង សកុណា រដ្ឋមន្ត្រី ក្រសួងវប្បធម៌និងវិចិត្រសិល្បៈ។ ជាក់ស្ដែង ពិធីសម្ពោធពិព័រណ៍សៀវភៅឆ្នាំនេះ នៅព្រឹកថ្ងៃទី០២ ខែធ្នូ ប្រារព្ធឡើងក្រោមអធិបតីភាពឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងឯកឧត្ដម ជុច ភឿន រដ្ឋលេខាធិការនៃក្រសួងវប្បធម៌ និងវិចិត្រសិល្បៈ។
គួរបញ្ជាក់ផងដែរថា នៅរសៀលថ្ងៃទី១នៃពិព័រណ៍ ឯកឧត្ដម ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចូលរួមជាកិត្តិយសក្នុងការទស្សនាការតាំងពិព័រណ៍សៀវភៅ។
ក្នុងពិព័រណ៍រយៈពេលបីថ្ងៃនេះ ចំនួនវាគ្មិនដែលចូលរួមមានចំនួន ៣៥រូប និងអ្នកសម្របសម្រួល ១០រូប។ និយាយពីចំនួនអ្នកចូលរួមវិញ ឃើញថាមានការកើនឡើងគួរឲ្យកត់សម្គាល់។ តាមការរំពឹងទុកថានឹងមានអ្នកចូលទស្សនាចំនួន ១៥000នាក់ តែជាក់ស្ដែងចំនួនអ្នកទស្សនាបានកើនដល់ជិត ២៥០០០នាក់ កើនឡើងខ្លាំងបើធៀបទៅនិងឆ្នាំមុន ដែលមានអ្នកចូលទស្សនាត្រឹមតែ ១២០០០ នាក់ ប៉ុណ្ណោះ។ តួលេខបានបង្ហាញថា ថ្ងៃដំបូងនៃការតាំងពិព័រណ៍ មានអ្នកចូលរួម ៥៥០០នាក់ ហើយថ្ងៃទី២ មានអ្នកចូលទស្សនាចំនួន ១០០៥០នាក់ និងសរុបចំនួនអ្នកចូលរួមទាំងបីថ្ងៃ មានចំនួន ២៤៩៦៣ នាក់ (តួលេខចុងក្រោយ ២៥០០០នាក់)។ ចំណែកឯចំនួនស្តង់ក៏មានការកើនឡើងគួរឲ្យកត់សម្គាល់ដែរ។ ជាក់ស្ដែង ពិព័រណ៍សៀវភៅឆ្នាំមុនមានត្រឹមតែ ៥០ស្តង់ ប៉ុណ្ណោះ, ចំណែកឆ្នាំនេះ បើតាមតួលេខផ្លូវការ មានចំនួន ៦៥ស្តង់ (*) តែបើយោងតាមការថ្លែងរបស់លោក ហុក សុទ្ធិ ប្រធានសមាគមបណ្ណារក្សនិងឯកសារវិទូ នៅល្ងាចថ្ងៃបិទបញ្ចប់នៃពិព័រណ៍ បានឲ្យដឹងថា ស្តង់កើនឡើងដល់ ៧០ស្តង់ ឯណោះ។ នៅល្ងាចថ្ងៃបិទបញ្ចប់នៃពិព័រណ៍នេះដែរ លោក ហុក សុទ្ធិ បានបង្ហើបឲ្យដឹងថា ពិព័រណ៍សៀវភៅឆ្នាំក្រោយ គ្រោងនឹងរៀបចំឡើងចាប់ពីថ្ងៃទី០៨ ដល់ ១០ ខែធ្នូ ឆ្នាំ២០១៧។
_______________
(*) តួលេខចុងក្រោយពីគេហទំព័រពិព័រណ៍សៀវភៅកម្ពុជា ៦៣ ស្តង់។
(*) តួលេខចុងក្រោយពីគេហទំព័រពិព័រណ៍សៀវភៅកម្ពុជា ៦៣ ស្តង់។
អត្ថបទ៖ ហេង-រង្សី
រូបភាព៖ Cambodia Book Fair
COMMENTS