កុំ​ភ្លេច​ចូលរួម​ណា​! ពិព័រណ៍​សៀវភៅ​ថ្នាក់​ជាតិ​លើក​ទី​៥ ឆ្នាំ​២០១៦ នឹង​ប្រព្រឹត្ត​ទៅ​នៅ​ថ្ងៃ​ស្អែក​នេះ​ហើយ

ពិព័រណ៍​សៀវភៅ​ថ្នាក់​ជាតិ​លើក​ទី​៥ ឆ្នាំ​២០១៦, មាន​អ្វី​ពិសេស​ខ្លះ?

ពិព័រណ៍​សៀវភៅ​ថ្នាក់​ជាតិ​ឆ្នាំ​នេះ ជា​ការ​តាំង​ពិព័រណ៍​សៀវភៅ​ថ្នាក់​ជាតិ​លើក​ទី​៥​ហើយ ក្រោម​ប្រធានបទ "បង្កើន​ការ​អាន បង្កើត​ការ​សរសេរ"។ កម្មវិធី​សម្ពោធ​ការ​តាំង​ពិព័រណ៍​សៀវភៅ​ថ្នាក់​ជាតិ​នឹង​ប្រព្រឹត្ត​ទៅ​នៅ​ថ្ងៃ​ស្អែក ថ្ងៃ​សុក្រ ទី​០២ ខែ​ធ្នូ ឆ្មាំ​២០១៦ នេះ​ហើយ ក្រោម​អធិបតីភាព៖

• ឯកឧត្ដម ខៀវ កាញារីទ្ធ រដ្ឋមន្ត្រី ក្រសួង​ព័ត៌មាន
• ឯកឧត្ដម ហង ជួន ណារ៉ុន រដ្ឋមន្ត្រី ក្រសួង​អប់រំ យុវជន និង​កីឡា
• លោកជំទាវ ភឿង សកុណា រដ្ឋមន្ត្រី ក្រសួង​វប្បធម៌​និង​វិចិត្រសិល្បៈ។

ក្នុង​ពិធី​សម្ពោធ​ការ​តាំង​ពិព័រណ៍​សៀវភៅ​នេះ​ដែរ នឹង​មាន​ការ​ចូលរួម​ពី​សិស្សានុសិស្ស ភ្ញៀវ​ជាតិ​និង​អន្តរជាតិ​ជា​ច្រើន​នាក់។ ក្រៅ​ពី​ការ​ដាក់​តាំង​សៀវភៅ​ក្នុង​កំលុង​ពេល​បី​ថ្ងៃ​នៃ​ពិព័រណ៍ ក៏​នៅ​មាន​កម្មវិធី​ផ្សេងៗ​ជា​ច្រើន​ទៀត ដែល​មាន​ការ​អញ្ជើញ​ចូលរួម​ពី​វាគ្មិន​ជា​ច្រើន​រូប។

១- ពិព័រណ៍​សៀវភៅ​ថ្នាក់​ជាតិ​លើក​ទី៥ ឆ្នាំ​២០១៦ ថ្ងៃ​ទី​១ (០២ ធ្នូ)

• កម្មវិធី​សម្ពោធ​ពិព័រណ៍​សៀវភៅ
• ការ​អាន​ជួយ​ឲ្យ​ខ្ញុំ​សម្រេច​បាន​នូវ​ក្ដី​ស្រមៃ​របស់​ខ្ញុំ
• ការ​តាំង​ពិព័រណ៍​សៀវភៅ​ខ្នាត​តូច
• គន្លឹះ​នៃ​ការ​សរសេរ​ដើម្បី​ទទួល​បាន​អាហារូបករណ៍ និង​កម្មវិធី​ផ្លាស់ប្ដូរ​ការ​សិក្សា 

២- ពិព័រណ៍​សៀវភៅ​ថ្នាក់​ជាតិ​លើក​ទី​៥ ឆ្នាំ​២០១៦ ថ្ងៃ​ទី​២ (០៣ ធ្នូ)

• របៀប​ប្រើប្រាស់​ឯកសារ STEM
• ការ​តាំង​ពិព័រណ៍​សៀវភៅ​ខ្នាត​តូច STEM
• របៀប​ប្រើប្រាស់​ព័ត៌មាន​ឲ្យ​មាន​ប្រសិទ្ធភាព
• "ពីពី ស្រោមជើងវែង" កុមារី​រឹងមាំ​ម្នាក់​នៅ​ក្នុង​អក្សរសិល្ប៍​កុមារ
• វេទិកា​ស្ដី​អំពី​ការ​បោះពុម្ពផ្សាយ​តាម​ប្រព័ន្ធ​អេឡិចត្រូនិក
• ការ​តាំង​ពិព័រណ៍​សៀវភៅ​ខ្នាត​តូច​ពី​ការ​បោះពុម្ពផ្សាយ​អេឡិចត្រូនិក 

៣- ពិព័រណ៍​សៀវភៅ​ថ្នាក់​ជាតិ​លើក​ទី​៥ ឆ្នាំ​២០១៦ ថ្ងៃ​ទី​៣ (០៤ ធ្នូ)

• ពី​សៀវភៅ​ទៅ​ជា​ខ្សែភាពយន្ត
• ការ​តាំង​ពិព័រណ៍​សៀវភៅ​ខ្នាត​តូច​នៃ​ស្ថាប័ន​អ្នកនិពន្ធ
• ការ​សន្ទនា​ពី​ការ​ពង្រឹង​សិទ្ធិ​អំណាច​ស្ត្រី​តាមរយៈ​អក្សរសិល្ប៍​កំណាព្យ
• អ្នក​អាន​ដែល​ខ្ជិល ក៏​អាច​ជំរុញ​ទឹកចិត្ត​អ្នក​អាន​ផ្សេង​ទៀត​បាន​ដែរ
• ការ​តាំង​ពិព័រណ៍​សៀវភៅ​ខ្នាត​តូច
• ការ​អភិវឌ្ឍ​ជំនាញ​អាន គឺ​ចាប់​ផ្ដើម​ពី​ដំណាក់កាល​ដំបូង​នៃ​ជីវិត

គួរ​បញ្ជាក់​ផង​ដែរ​ថា ពិព័រណ៍​សៀវភៅ​ថ្នាក់​ជាតិ​ឆ្នាំ​២០១៦ នេះ​នឹង​ប្រព្រឹត្ត​ទៅ​ចាប់​ពី​ថ្ងៃ​ទី​០២ ដល់ ថ្ងៃ​ទី​០៤ ខែ​ធ្នូ នៅ​បណ្ណាល័យ​ជាតិ​កម្ពុជា ផ្លូវ​លេខ​៩២ សង្កាត់​វត្តភ្នំ ខណ្ឌ​ដូនពេញ រាជធានី​ភ្នំពេញ (ខាង​លិច​វត្តភ្នំ)។

ពិព័រណ៍​សៀវភៅ​នៅ​កម្ពុជា បើក​ឲ្យ​ចូលរួម​ដោយ​សេរី។ ដូចនេះ សូម​អញ្ជើញ​ចូលរួម​កម្មវិធី​នេះ​ឲ្យ​បាន​ច្រើន​កុះករ ដើម្បី​ទទួល​បាន​អត្ថប្រយោជន៍​ជាច្រើន​ពី​កម្មវិធី រួម​ទាំង​ការ​បញ្ចុះ​តម្លៃ​លើ​ការ​ទិញ​សៀវភៅ ជួប​ផ្ទាល់​ជាមួយ​ម្ចាស់​ស្នាដៃ និង​ទទួល​យក​ចំណេះដឹង​អំពី​ការ​អាន​និង​តែង​និពន្ធ​ពី​វាគ្មិន​ជាច្រើន​រូប។

ជួប​គ្នា​នៅ បណ្ណាល័យ​ជាតិ ចាប់​ពី​ថ្ងៃ​ទី​០២ ដល់ ថ្ងៃ​ទី​០៤ ខែ​ធ្នូ ឆ្នាំ​២០១៦។
កុំ​ភ្លេច​ចូល​រួម​ទាំង​អស់​គ្នា​ណា...!

អត្ថបទ៖ ហេង-រង្សី

រូបភាព៖ Cambodia Book Fair