"ស្វែងយល់អំពីពិព័រណ៍សៀវភៅថ្នាក់ជាតិនៅកម្ពុជា" តើពិព័រណ៍នេះចាប់ផ្ដើមប្រារព្ធនៅពេលណា? អ្វីខ្លះជាគោលបំណងនៃពិព័រណ៍នេះ?
ព្រឹត្តិការណ៍ដ៏វិសេសនេះ ត្រូវបានរៀបចំឡើងដោយបណ្ណាល័យជាតិកម្ពុជា រួមសហការជាមួយក្រសួងពាក់ព័ន្ធ អ្នកបោះពុម្ពផ្សាយកម្ពុជា និងអង្គការជាតិនានា ហើយប្រារព្ធឡើងនៅបរិវេណបណ្ណាល័យជាតិ។ នៅក្នុងពិព័រណ៍សៀវភៅថ្នាក់ជាតិនេះផងដែរ ក៏មានការចូលរួមពីថ្នាក់ដឹកនាំពីក្រសួងពាក់ព័ន្ធនានាដូចជា ក្រសួងអប់រំយុវជន និងកីឡា ក្រសួងវប្បធម៌និងវិចិត្រសិល្បៈ ជាដើម។ ក្នុងនោះដែរ ក៏មានការអញ្ជើញចូលរួមពីវាគ្មិនជាច្រើនរូបដើម្បីធ្វើបទបង្ហាញ ដែលផ្ដោតសំខាន់លើការជំរុញការអាននិងគុណភាពនៃស្នាដៃអ្នកនិពន្ធជាដើម។ ការរៀបចំនូវពិព័រណ៍សៀវភៅថ្នាក់ជាតិនេះឡើង គឺដើម្បីលើកទឹកចិត្តដល់ការបោះពុម្ពផ្សាយនៅក្នុងប្រទេសកម្ពុជា និងជួយជំរុញវិស័យការអានក្នុងប្រទេសកម្ពុជាឲ្យមានសន្ទុះទៅមុខ នេះបើយោងតាមប្រសាសន៍របស់ លោកស្រី ខ្លូត វិបុលឡា នាយិកាបណ្ណាល័យជាតិ ដែលបានថ្លែងក្នុងបទយកការណ៍មួយក្នុងព្រឹត្តិការណ៍ពិព័រណ៍សៀវភៅនៅកម្ពុជា លើកទី៤ ឆ្នាំ២០១៥។
នៅប៉ុន្មានឆ្នាំចុងក្រោយនេះ វិស័យបោះពុម្ពផ្សាយនៅកម្ពុជាបានបោះជំហានរីកចម្រើនជាលំដាប់។ ទន្ទឹមនិងភាពរីកចម្រើននៃការបោះពុម្ពផ្សាយ គេនៅសង្កេតឃើញថា វិស័យការអាននៅកម្ពុជានៅមានកម្រិតនៅឡើយ។ បើទោះបីជា គ្រឹះស្ថានបោះពុម្ពផ្សាយជាច្រើន ត្រូវបានបង្កើតជាបន្តបន្ទាប់ក្ដី កម្រិតនៃការអាននៅកម្ពុជានៅតែជារឿងគួរឲ្យព្រួយបារម្ភដដែល។ បញ្ហាទីផ្សារនៅតែជាបញ្ហាដ៏សំខាន់ សម្រាប់អ្នកបោះពុម្ពផ្សាយនៅកម្ពុជា ព្រោះប្រជាជនកម្ពុជាហាក់ពុំសូវចាប់អារម្មណ៍លើការអានសៀវភៅប៉ុន្មាននោះទេ។
លោកស្រី នាយិកាបណ្ណាល័យជាតិ បានបញ្ជាក់ទៀតថា ការរៀបចំនូវពិព័រណ៍សៀវភៅនេះឡើងដោយដើរលើផ្លូវទន្ទឹមគ្នាពីរគឺ ទី១ ជួយជំរុញការបោះពុម្ពផ្សាយរបស់កវីនិពន្ធ វិចិត្រករ សិល្បករ និងទី២ ជួយជំរុញវិស័យការអាន។
ការរៀបចំនូវពិព័រណ៍សៀវភៅឡើងបានជួយលើផ្នែកផ្សព្វផ្សាយនិងទីផ្សារ ទាំងសម្រាប់កវីនិពន្ធដែលជាម្ចាស់ស្នាដៃ អ្នកបោះពុម្ពផ្សាយ និងវិចិត្រករដែលជាអ្នករចនាលម្អសៀវភៅ។ លើសពីនេះទៀត ការរៀបចំនូវពិព័រណ៍សៀវភៅឡើង បានចូលរួមលើកកម្ពស់និងជំរុញឲ្យមានទម្លាប់នៃការអាន ហើយរួមចំណែកបង្វែរឥរិយាបថរបស់យុវជន ក៏ដូចជាប្រជាជនខ្មែរទាំងមូលឲ្យងាកមកចាប់អារម្មណ៍លើការអានសៀវភៅ ជាជាងការចាប់អារម្មណ៍តែទៅលើការប្រើប្រាស់ប្រព័ន្ធអេឡិចត្រូនិកតែម្យ៉ាង។ ក្រោមការផ្ដួចផ្ដើមនិងយកចិត្តទុកដាក់របស់បណ្ណាល័យជាតិកម្ពុជា ពិព័រណ៍សៀវភៅនៅកម្ពុជាមានការរីកចម្រើននិងមានប្រជាប្រិយភាពជាលំដាប់ពីមួយឆ្នាំទៅមួយឆ្នាំ។ ជារៀងរាល់ឆ្នាំ ក្នុងរយៈពេលបីថ្ងៃនៃការតាំងពិព័រណ៍ ក្រៅពីការដាក់បង្ហាញសៀវភៅដ៏សម្បូរបែបពីគ្រឹះស្ថានបោះពុម្ពផ្សាយជាច្រើននៅកម្ពុជាជាមួយនិងឱកាសនៃការបញ្ចុះតម្លៃលើការទិញសៀវភៅ ក៏នៅមានកម្មធីជាច្រើនទៀត ដែលជួយជំរុញដល់ការអាន ទាំងសម្រាប់កុមារនិងយុវវ័យ។ ក្នុងនោះដែរ ក៏មានកម្មវិធីកម្សាន្តជាច្រើនទៀតផងដែរ ក្នុងរយៈពេលបីថ្ងៃនៃការតាំងពិព័រណ៍។
គួររម្លឹកផងដែរថា ពិព័រណ៍សៀវភៅនៅកម្ពុជា បានធ្វើឡើងចំនួន៨លើករួចមកហើយ បើគិតត្រឹមឆ្នាំ២០១៩។
ពិព័រណ៍សៀវភៅនៅកម្ពុជា បើកឲ្យចូលរួមដោយសេរី។ ដូចនេះ សូមអញ្ជើញចូលរួមកម្មវិធីនេះឲ្យបានច្រើនកុះករ ដើម្បីទទួលបានអត្ថប្រយោជន៍ជាច្រើនពីកម្មវិធី រួមទាំងការបញ្ចុះតម្លៃលើការទិញសៀវភៅ ជួបផ្ទាល់ជាមួយម្ចាស់ស្នាដៃ និងចូលរួមរីករាយជាមួយកម្មវិធីកម្សាន្តជាច្រើនទៀត។
ជួបគ្នានៅ បណ្ណាល័យជាតិ!
កុំភ្លេចចូលរួមទាំងអស់គ្នាណា...!
- ពិព័រណ៍សៀវភៅនៅកម្ពុជា លើកទី១ ឆ្នាំ២០១១ ប្រព្រឹត្តទៅចាប់ពីថ្ងៃទី២៥ ដល់ ថ្ងៃទី២៧ ខែវិច្ឆិកា ក្រោមប្រធានបទ "រួមគ្នាអានដើម្បីអភិវឌ្ឍន៍" នៅបរិវេណបណ្ណាល័យជាតិកម្ពុជា។
- ពិព័រណ៍សៀវភៅនៅកម្ពុជា លើកទី២ ឆ្នាំ២០១៣ ប្រព្រឹត្តទៅចាប់ពីថ្ងៃទី២៩ ខែវិច្ឆិកា ដល់ ថ្ងៃទី០១ ខែធ្នូ ក្រោមប្រធានបទ "កម្ពុជា និងការបោះពុម្ពផ្សាយ" នៅបរិវេណបណ្ណាល័យជាតិកម្ពុជា។
- ពិព័រណ៍សៀវភៅនៅកម្ពុជា លើកទី៣ ឆ្នាំ២០១៤ ប្រព្រឹត្តទៅចាប់ពីថ្ងៃទី២៨ ដល់ ថ្ងៃទី៣០ ខែវិច្ឆិកា ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានខ្ញុំយល់ពីពិភពលោក"។
- ពិព័រណ៍សៀវភៅនៅកម្ពុជា លើកទី៤ ឆ្នាំ២០១៥ ប្រព្រឹត្តទៅចាប់ពីថ្ងៃទី១១ ដល់ ថ្ងៃទី១៣ ខែធ្នូ ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានខ្ញុំថ្ងៃនេះ ជោគជ័យថ្ងៃស្អែក"។
- ពិព័រណ៍សៀវភៅនៅកម្ពុជា លើកទី៥ ឆ្នាំ២០១៦ ប្រព្រឹត្តទៅចាប់ពីថ្ងៃទី០២ ដល់ ថ្ងៃទី០៤ ខែធ្នូ ចាប់ពីម៉ោង៨ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "បង្កើនការអាន បង្កើតការសរសេរ"។
- ពិព័រណ៍សៀវភៅនៅកម្ពុជា លើកទី៦ ឆ្នាំ២០១៧ ប្រព្រឹត្តទៅចាប់ពីថ្ងៃទី០៨ ដល់ ថ្ងៃទី១០ ខែធ្នូ ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានច្រើន បង្កើនឱកាស"។
- ពិព័រណ៍សៀវភៅនៅកម្ពុជា លើកទី៧ ឆ្នាំ២០១៨ ប្រព្រឹត្តទៅចាប់ពីថ្ងៃទី០៧ ដល់ ថ្ងៃទី០៩ ខែធ្នូ ចាប់ពីម៉ោង៧:៣០នាទីព្រឹក ដល់ ម៉ោង៧:៣០នាទីល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "សៀវភៅរស់ ចំណេះរីក"។
- ពិព័រណ៍សៀវភៅនៅកម្ពុជា លើកទី៨ ឆ្នាំ២០១៩ នឹងប្រព្រឹត្តទៅចាប់ពីថ្ងៃទី១៣ ដល់ ថ្ងៃទី១៥ ខែធ្នូ ក្រោមប្រធានបទ "ផ្ដើមក្ដីស្រមៃ ដៃកាន់សៀវភៅ"។
ពិព័រណ៍សៀវភៅនៅកម្ពុជា បើកឲ្យចូលរួមដោយសេរី។ ដូចនេះ សូមអញ្ជើញចូលរួមកម្មវិធីនេះឲ្យបានច្រើនកុះករ ដើម្បីទទួលបានអត្ថប្រយោជន៍ជាច្រើនពីកម្មវិធី រួមទាំងការបញ្ចុះតម្លៃលើការទិញសៀវភៅ ជួបផ្ទាល់ជាមួយម្ចាស់ស្នាដៃ និងចូលរួមរីករាយជាមួយកម្មវិធីកម្សាន្តជាច្រើនទៀត។
ជួបគ្នានៅ បណ្ណាល័យជាតិ!
កុំភ្លេចចូលរួមទាំងអស់គ្នាណា...!
 |
| ផែនទីបណ្ណាល័យជាតិ |
អត្ថបទ៖ ហេង-រង្សី
រូបភាព៖ Cambodia Book Fair
COMMENTS