ពិព័រណ៍សៀវភៅកម្ពុជា គឺជាព្រឹត្តិការណ៍ថ្នាក់ជាតិដ៏ធំមួយដែលត្រូវបានរៀបចំឡើងជារៀងរាល់ឆ្នាំដោយបណ្ណាល័យជាតិកម្ពុជា រួមសហកា...
ក្នុងឆ្នាំ ២០២០ នេះ គណៈកម្មការពិព័រណ៍សៀវភៅ បានសម្រេចយកសប្ដាហ៍ទី ២ នៃខែធ្នូ ជា "សប្ដាហ៍សៀវភៅ" ជំនួសឲ្យការរៀបចំពិព័រណ៍សៀវភៅសម្រាប់ឆ្នាំ ២០២០ ក្នុងកាលៈទេសៈវិបត្តិនៃការរីករាលដាលនៃវីរុសកូវីដ-១៩ ដែលមិនអាចរៀបចំពិព័រណ៍សៀវភៅថ្នាក់ជាតិបាន។ "សប្ដាហ៍សៀវភៅ" នឹងប្រារព្ធឡើងពេញមួយសប្ដាហ៍ទី ២ នៃខែធ្នូ គិតចាប់ពីថ្ងៃទី ១២ ខែធ្នូ ឆ្នាំ ២០២០ ដល់ថ្ងៃទី ១៩ ខែធ្នូ ឆ្នាំ ២០២០ ក្រោមប្រធានបទ "សម័យកូវីដ កាន់តែស្និទ្ធនឹងសៀវភៅ" ដោយមានកិច្ចសហការពីក្រសួងស្ថាប័នចំនួនបីគឺ ក្រសួងវប្បធម៌ និងវិចិត្រសិល្បៈ, ក្រសួងព័ត៌មាន, និងក្រសួងអប់រំ យុវជន និងកីឡា។ ក្នុងរយៈពេលពេញមួយសប្ដាហ៍នេះ "សប្ដាហ៍សៀវភៅ" បានរួមបញ្ចូលសកម្មភាពមួយចំនួន ដែលនឹងរៀបចំតាមប្រព័ន្ធអនឡាញ មានដូចជា ការផ្សព្វផ្សាយសៀវភៅនិងវីដេអូរបស់អ្នកនិពន្ធ អ្នកបោះពុម្ពផ្សាយ បណ្ណាគារិក អ្នកលក់សៀវភៅ ដៃគូអភិវឌ្ឍវិស័យសៀវភៅនិងការអាន និងគ្រឹះស្ថានអប់រំផ្សេងៗ នៅលើគេហទំព័ររបស់ពិព័រណ៍សៀវភៅកម្ពុជា។ លើសពីនេះទៀត ក៏នៅមានការជួបសំណេះសំណាលជាមួយនឹងវាគ្មិនពិសេសៗ ដែលនឹងអញ្ជើញចូលរួមតាមរយៈកម្មវិធី Zoom។
គួររម្លឹកផងដែរថា ពិព័រណ៍សៀវភៅនៅកម្ពុជា បានធ្វើឡើងចំនួន៨លើករួចមកហើយ បើគិតត្រឹមឆ្នាំ២០១៩។
- ពិព័រណ៍សៀវភៅនៅកម្ពុជា លើកទី១ ឆ្នាំ២០១១ ប្រព្រឹត្តទៅចាប់ពីថ្ងៃទី២៥ ដល់ ថ្ងៃទី២៧ ខែវិច្ឆិកា ក្រោមប្រធានបទ "រួមគ្នាអានដើម្បីអភិវឌ្ឍន៍" នៅបរិវេណបណ្ណាល័យជាតិកម្ពុជា។
- ពិព័រណ៍សៀវភៅនៅកម្ពុជា លើកទី២ ឆ្នាំ២០១៣ ប្រព្រឹត្តទៅចាប់ពីថ្ងៃទី២៩ ខែវិច្ឆិកា ដល់ ថ្ងៃទី០១ ខែធ្នូ ក្រោមប្រធានបទ "កម្ពុជា និងការបោះពុម្ពផ្សាយ" នៅបរិវេណបណ្ណាល័យជាតិកម្ពុជា។
- ពិព័រណ៍សៀវភៅនៅកម្ពុជា លើកទី៣ ឆ្នាំ២០១៤ ប្រព្រឹត្តទៅចាប់ពីថ្ងៃទី២៨ ដល់ ថ្ងៃទី៣០ ខែវិច្ឆិកា ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានខ្ញុំយល់ពីពិភពលោក"។
- ពិព័រណ៍សៀវភៅនៅកម្ពុជា លើកទី៤ ឆ្នាំ២០១៥ ប្រព្រឹត្តទៅចាប់ពីថ្ងៃទី១១ ដល់ ថ្ងៃទី១៣ ខែធ្នូ ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានខ្ញុំថ្ងៃនេះ ជោគជ័យថ្ងៃស្អែក"។
- ពិព័រណ៍សៀវភៅនៅកម្ពុជា លើកទី៥ ឆ្នាំ២០១៦ ប្រព្រឹត្តទៅចាប់ពីថ្ងៃទី០២ ដល់ ថ្ងៃទី០៤ ខែធ្នូ ចាប់ពីម៉ោង៨ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "បង្កើនការអាន បង្កើតការសរសេរ"។
- ពិព័រណ៍សៀវភៅនៅកម្ពុជា លើកទី៦ ឆ្នាំ២០១៧ ប្រព្រឹត្តទៅចាប់ពីថ្ងៃទី០៨ ដល់ ថ្ងៃទី១០ ខែធ្នូ ចាប់ពីម៉ោង៧ព្រឹក ដល់ ម៉ោង៧ល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "អានច្រើន បង្កើនឱកាស"។
- ពិព័រណ៍សៀវភៅនៅកម្ពុជា លើកទី៧ ឆ្នាំ២០១៨ ប្រព្រឹត្តទៅចាប់ពីថ្ងៃទី០៧ ដល់ ថ្ងៃទី០៩ ខែធ្នូ ចាប់ពីម៉ោង៧:៣០នាទីព្រឹក ដល់ ម៉ោង៧:៣០នាទីល្ងាច នៅបរិវេណបណ្ណាល័យជាតិកម្ពុជា ក្រោមប្រធានបទ "សៀវភៅរស់ ចំណេះរីក"។
- ពិព័រណ៍សៀវភៅនៅកម្ពុជា លើកទី៨ ឆ្នាំ២០១៩ នឹងប្រព្រឹត្តទៅចាប់ពីថ្ងៃទី១៣ ដល់ ថ្ងៃទី១៥ ខែធ្នូ ក្រោមប្រធានបទ "ផ្ដើមក្ដីស្រមៃ ដៃកាន់សៀវភៅ"។
កុំភ្លេចចូលរួមតាមដាន ទំព័រហ្វេសប៊ុក Cambodia Book Fair នូវរាល់ព្រឹត្តិការណ៍ ថ្មីៗប្លែកៗ ដែលរៀបចំឡើងក្នុងរយៈពេលពេញមួយសប្ដាហ៍នេះ។
#CBF2020 #WeekOfBooks
អត្ថបទ៖ ហេង-រង្សី (ផលព្រឹក្ស)
រូបភាព៖ Cambodia Book Fair
COMMENTS