រៀន​ពាក្យ​ខ្មែរ​៖ ការ​ភាន់ច្រឡំ​ថា ការកនាម ត្រូវ​តែ​មាន​បច្ឆិម​បទ "ករ"

ធម្មទាន​នៃ​ការ​រៀន​ភាសាខ្មែរ ការកនាម យើង​សង្កេត​ឃើញ​នូវ​ការ​ភាន់ច្រឡំ​ថា ការកនាម (នាមសព្ទ​ដែល​ជា​មនុស្ស​ឬ​សត្វ​ដែល​ទទួល​សម្រេច​នូវ​អំពើ​ដោយ...

ធម្មទាន​នៃ​ការ​រៀន​ភាសាខ្មែរ

ការកនាម

យើង​សង្កេត​ឃើញ​នូវ​ការ​ភាន់ច្រឡំ​ថា ការកនាម (នាមសព្ទ​ដែល​ជា​មនុស្ស​ឬ​សត្វ​ដែល​ទទួល​សម្រេច​នូវ​អំពើ​ដោយ​ខ្លួនឯង) ត្រូវ​តែ​មាន​បច្ឆិម​បទ "ករ"។

ឧទាហរណ៍: កសិករ, កម្មករ...

ដោយ​គិត​ភ័ន្តច្រឡំ​បែប​ដូចនេះ គេ​ក៏​ប្រើ៖ ឃាតករ, ពាណិជ្ជករ, សេវករ, សវនករ, វិច្ឆេទករ ជាដើម...

ការ​គិត​ដូចនេះ​មិន​ត្រឹមត្រូវ​ទាំងស្រុង​នោះ​ទេ។

កំហុស​នៃ​ការ​ប្រើ​ការកនាម​នេះ ដែល​មាន​បច្ឆិម​បទ “ករ” ត្រូវ​បាន​ប្រើ​ស្ទើរតែ​ក្លាយ​ទម្លាប់​ទៅ​ហើយ។

សូម​មេត្តា​ពិនិត្យ​មើល​ពាក្យ​ខាងក្រោម:

ឃាតកៈ (ឃា-តៈ-កៈ) ន. អ្នកសម្លាប់ (មិនមែន​ឃាតករ) ទំព័រ១៦០

ចោទកៈ ឬ ចោទក៍ (ចោ-ទៈ-កៈ ឬ ចោត) ន. អ្នកចោទ (មិនមែន​ចោទករ) ទំព័រ២០៥

សវនកៈ​ (សៈវ៉ៈន៉ៈកៈ)​ ន.​ អ្នកស្ដាប់​ (មិនមែនសវនករ)​ទំព័រ១៣១៤

សេវកៈ ឬ សេវ័ក (សេ-វៈ-កៈ ឬ សេ-វ៉ាក់) ន. អ្នកបម្រើ (មិនមែន​សេវករ) ទំព័រ១៤០៤

ពាណិជ (ពា-និច) ន. អ្នកជំនួញ (មិនមែន​ពាណិជ្ជករ) ទំព័រ៧៤៣

វិច្ឆេទការី (វិច-ឆេទៈ-ការ៉ី) ន. អ្នក​បំផ្លាញ​ឲ្យ​ខូច (មិនមែន​វិច្ឆេទករ) ទំព័រ១១៨១

ឯកសារ​យោងៈ វចនានុក្រម​សម្ដេច​ព្រះ​សង្ឃរាជ ជួន ណាត ជោតញ្ញាណោ

 
ស្រង់​ពី​ហ្វេសប៊ុក​លោក ទុត​-​បូ (​ចុះ​ផ្សាយ​៖ ០២ កុម្ភៈ ២០២០​)