រៀន​ពាក្យ​ខ្មែរ​៖ ដំណឹក?

ធម្មទាន​នៃ​ការ​រៀន​ពាក្យ​ខ្មែរ ដំណឹក? ពាក្យ "ដំណឹក" នេះ មិន​មាន​នៅ​ក្នុង​វចនានុក្រម​របស់​សម្ដេច​ព្រះ​សង្ឃរាជ ជួន ណាត ទេ តែ​វា​ត្រ...

ធម្មទាន​នៃ​ការ​រៀន​ពាក្យ​ខ្មែរ

ដំណឹក?

ពាក្យ "ដំណឹក" នេះ មិន​មាន​នៅ​ក្នុង​វចនានុក្រម​របស់​សម្ដេច​ព្រះ​សង្ឃរាជ ជួន ណាត ទេ តែ​វា​ត្រូវ​បាន​គេ​បង្កើត​ឡើង តាម​របៀប​ដូចជា៖

- ដើរ (កិ.) ដំណើរ
- ដឹង (កិ.) ដំណឹង

ខ្មែរ​តែងតែ​ប្រើ "ដឹក" ជា​នាមសព្ទ​របស់​កិរិយាសព្ទ "ដឹក" ដែល​សំដៅ​ដល់​បរិមាណ ឬ ចំនួន​នៃ​ការ​ដឹក

ដឹក
កិរិយាសព្ទ
នាំ​យក​ទៅ​មក​ដោយ​គ្រឿង​ផ្ទុក​មាន​រទេះ ទូក​ជាដើម
ដឹក​ឈើ, ដឹក​ឧស, ដឹក​ស្រូវ ។
នាំ​បណ្ដើរ​ដោយ​កាន់​ខ្សែ
ដឹក​គោ , ដឹក​សេះ ។

កាន់​ខ្សែ​ទាញ​អូស​ទាំង​២​ខាង
ដឹក​គន ( ម. ព. គន ) ។

គូស​អូស​ឲ្យ​ដិត​ជា​ស្នាម​គំនូស
ដឹក​បន្ទាត់ ។

នាមសព្ទ
ចំនួន, ទម្ងន់ ដែល​ល្មម​ដឹក​នាំ​យក​ទៅ​មក​បាន
ស្រូវ១ ដឹក, ពោត ២ ដឹក ។

វា​មិន​ខុស​ទាស់​សោះ​ឡើយ នៅ​ក្នុង​ការ​បង្កើត​នាមសព្ទ​ទៅ​តាម​ក្បួនខ្នាត​មួយ ក៏ប៉ុន្តែ​វា​ក៏​មាន​ជា​ការ​លើកលែង​ផង​ដែរ ដែល​ពាក្យ​នោះ វា​មាន​លក្ខណៈ​ឆ្គង​នឹង​ត្រចៀក ហើយ​មិន​ត្រូវ​បាន​គេ​និយម​ប្រើ...

យើង​អាច​យក​ភាសា​អង់គ្លេស​មក​ប្រៀបធៀប ដូចជា៖
- គេ​អាច​និយាយ​ថា៖ a little old lady
ប៉ុន្តែ​គេ​មិន​អាច​និយាយ​ថា៖ a little young lady បាន​នោះ​ទេ ទោះបីជា​គេ​ធ្វើ​សម្ពន្ធ​តាម​ក្បួន​វេយ្យាករណ៍ ឃើញ​ថា វា​មិន​ខុស​ក៏ដោយ តែ​គេ​មិន​ប្រើ​វា​តែម្ដង...

ឯកសារយោង៖ វចនានុក្រម​របស់​សម្ដេច​ព្រះ​សង្ឃ​រាជ ជួន ណាត ជោតញ្ញាណោ

ស្រង់​ពី​ហ្វេសប៊ុក​លោក ទុត​-​បូ (​ចុះ​ផ្សាយ​៖ ១០ កុម្ភៈ ២០២១​)