រៀន​ពាក្យ​ខ្មែរ៖ សវនកម្ម

ធម្មទាន​នៃ​ការ​ឈ្វេងយល់​អំពី​ការ​ប្រើ​ពាក្យ​ខ្មែរ សវនកម្ម សវនៈ (សៈវ៉ៈន៉ៈ) នាមសព្ទ ( បា. សវន; សំ. ឝ្រវណ ) ការ​ឮ, ការ​ស្ដាប់; ត្រចៀក ។ សវនកាល ...

ធម្មទាន​នៃ​ការ​ឈ្វេងយល់​អំពី​ការ​ប្រើ​ពាក្យ​ខ្មែរ

សវនកម្ម

សវនៈ
(សៈវ៉ៈន៉ៈ)
នាមសព្ទ
( បា. សវន; សំ. ឝ្រវណ ) ការ​ឮ, ការ​ស្ដាប់; ត្រចៀក ។
សវនកាល (សៈវ៉ៈន៉ៈ– ) ពេល​ដែល​គួរ​ស្ដាប់, ពេល​កំពុង​ស្ដាប់ ។
សវនកិច្ច ( សៈវ៉ៈន៉ៈកិច ) កិច្ច​ដែល​ត្រូវ​ស្ដាប់ ។
សវនាការ (សៈវ៉ៈន៉ាកា; បា. សវន + អាការ ) អាការ​នៃ​ការ​ស្ដាប់, អាការ​ស្ដាប់ ។
ខ្មែរ​ប្រើ​ជា កិ. "ស្ដាប់" ក៏មាន; ( រ. ស. ) : ទ្រង់​ព្រះ​សវនាការ ទ្រង់​ព្រះ​សណ្ដាប់ ។
សវនានិសង្ស (សៈវ៉ៈន៉ានិសង់; បា. សវន + អានិសំស ) អានិសង្ស​ដែល​បាន​ពី​ការ​ស្ដាប់ ។
(ទំព័១៣១៤)

នៅ​ក្នុង​វចនានុក្រម​អង់គ្លេស-ខ្មែរ ដោយ Franklin E. Huffman and Im Proum បោះពុម្ព​ឆ្នាំ១៩៧៨ បាន​ពន្យល់​ពាក្យ៖
audit (tv) ជម្រះបញ្ជី (n) ការ​ជម្រះ​បញ្ជី គឺ​មិនមែន​បកប្រែ​ថា "សវនកម្ម" ទេ (ទំព័រ៣៩-៤០)
audition (n) ការស្ដាប់ ឬ មើល​ការ​សម្ដែង​របស់​សិល្បករ​ដែល​មក​សុំ​ការ​ធ្វើ, សវនកម្ម
(iv) ទៅ​សម្ដែង​សិល្បៈ​ដំបូង​ពេល​សុំ​គេ​ធ្វើ​ការ
(tv) ឲ្យ​សិល្បករ​មក​សម្ដែង​ដើម្បី​នឹង​ជ្រើសរើស
auditor(n) business auditor អ្នក​ជម្រះ​បញ្ជី
auditor of speech អ្នក​ស្ដាប់, សវនកៈ
auditorium(n) សវនដ្ឋាន​គឺ​ទី​ប្រជុំ​គ្នា​ស្ដាប់​អ្វី​មួយ
auditory(adj) នៃ​សោតវិញ្ញាណ(នៃ​ការ​ស្ដាប់)
(ទំព័រ៤០)

នៅ​ក្នុង​វចនានុក្រម​ខ្មែរ-អង់គ្លេស ដោយRobert K. Headley,Jr., Kylin Chhor, Lam Kheng Lim, Lim Hak Kheang, Chen Chun បោះពុម្ព​ដោយ The Catholic University of America Press
សវនៈ n. hearing, listening; ear; p. to listen
សវនកៈ auditor
សវនកម្ម audition
សវនកាល audition time
សវនកិច្ច subject to be listened to
សវនដ្ឋាន auditorium
សវនាការ audience; hearing (leg.) ទំព័រ១១០៧ 

យោង​តាម​អត្ថន័យ​ខាងលើ​នេះ "សវនកម្ម" គឺ​ជា​អំពើ​នៃ​ការ​ស្ដាប់ ហើយ​វា​ដូចជា​មិន​មាន​ន័យ​ពាក់ព័ន្ធ​ទៅ​នឹង​សកម្មភាព​នៃ​ការ​ត្រួតពិនិត្យ​បញ្ជី​នោះ​ទេ

យោង​តាម​អត្ថន័យ​ខាងលើ យើង​អាច​សន្មត​បាន​ថា វា​ប្រហែល​ជា​មាន​ការ​បកប្រែ និង​ប្រើ​ដោយ​ភ័ន្តច្រឡំ​រវាង​ពាក្យ audit និង audition ដែល​ក្រោយ​មក វា​បណ្ដាល​ឲ្យ​មាន​ការ​ប្រើ​ពាក្យ "សវនកម្ម" មាន​ន័យ​ទៅជា "ការជម្រះបញ្ជី" ទៅ​វិញ...

ឯកសារយោង៖
-វចនានុក្រម​របស់​សម្ដេចព្រះសង្ឃរាជ ជួន ណាត ជោតញ្ញាណោ
-វចនានុក្រម​អង់គ្លេស-ខ្មែរ English-Khmer Dictionary by Franklin Huffman and Im Proum
-វចនានុក្រម​ខ្មែរ-អង់គ្លេស ដោយRobert K. Headley,Jr. Kylin Chhor, Lam Kheng Lim, Lim Hak Kheang, Chen Chun បោះពុម្ព​ដោយ The Catholic University of America Press

ស្រង់​ចេញ​ពី​ហ្វេសប៊ុក​លោក ទុត-បូ (ចុះ​ផ្សាយ៖ ០៩ វិច្ឆិកា ២០២០)